حملة (هنتغير بجد)..للشباب

(

اشحن رصيدك)
26
(يلا بينا نصلى )

+السلام عليكم ورحمه الله وبركاته

=وعليكم السلام ورحمه الله وبركاته

+موضوعنا النهارده مهم جدا
ويمكن هو الاهم فى حملتنا

=يعنى اللى فات مش مهم

+طبعا مهم ولكن لازم علشان نضمن
انه يتقبل
يبقى حلقه النهارده

=ليه هيا بتتكلم عن ايه ؟؟

+عن احلى حاجه
واحلى هديه
من رب البريه

=ايوه ياعم بتعرف تألف اشعار

+لا بأمانه دى حفظتها من الشيخ
محمد حسان

=ربنا يبارك له بس ديما مكشر

+لا ده كان زمان وكلامه اكتر من رائع كل شيخ وله طريقه
المهم حلقتنا النهارده عن

"الصلاه "

هديه ربنا اعطاها لكل خلقه
من البشر ولكن مين اللى عاوزها

=بص معلش موضوع زى ده
مهم جدا
ولكن احنا عاوزين نتكلم بصراحه
كل الحواجز اللى بيننا علشان اطلع كل اللى فى قلبى

+بص انا عاوزك تفك خالص
علشان ناخد اكبر خطوه فى طريق التغيير

=ماشى فى الاول كده
انا عندى كام مشكله

+ماشى ناخدهم واحده واحده ونحاول نحلهم

=ماشى اول واحده
وهى المصيبه
(الكسل )
كل لما اقول هصلى اكسل جامد اوى
والاقى حاجه تشغلنى وماتخلينيش اصلى

+بص مين يعرف عن نفسك اكتر انت ولا اللى خلقك

=طبعا اللى خلقنى حبيبى

+طيب ربنا عرض المشكله دى فى القران الكريم وقال
سبحانه
(واستعينو بالصبر والصلاه وانها لكبيره )وكبيره بمعنى تقيله
بتخليك تكسل
ونكمل (الا على الخاشعين )
يعنى الا الناس دول
تقيله على كل الناس
وخلى بالك ربنا ما قلش
الا على المصلين
لان فى ناس كتير بيصلوا
ومش بيخشعوا
وبالتالى ممكن
يتعرض لموقف يسيب الصلاه
بسببه ويكسل زى حضرتك

=طيب مين هما الخاشعين دول ؟

+ربنا قال(الذين يظنون انهم
ملاقو ربهم وانهم اليه راجعون)
يعنى حسبينها صح
عارفين ان حتى لو عصيته
او اطاعته برده راجعله
ورايحله يبقى من دلوقتى
احسن وعارفين انهم
رايحين لله
الكريم الغفور التواب
علشان يتكلمو معاه
ولسه هنتكلم ازاى نخشع ونحس بالصلاه ونعيشها بجد

=طيب وفى مشكله تانيه
هى مش الصلاه بتنضف القلب وبتخليه ابيض
طيب طالما القلب ابيض جاهز يبقى مش مشكله الصلاه

+بص ربنا حبيبنا قال
(ان الذين آمنو وعملو الصلحات )
ومافيش ولا ايه بتقول
انا الذين آمنوا بس
اذن ماينفعش ان انا اومن
بربنا من غير ما اعمل عمل
صالح

=طيب ما انا بعمل اعمال صالحه

+ومين قالك انها مقبوله ؟

=.....يعنى ايه ؟؟؟؟

+يعنى اول حاجه يوم القيامه وانت واقف ادام ربنا
هيسألك عن الصلاه
لو كنت بتصلى يبقى
كل اعمال الخير مقبوله
وكأن الصلاه واسطه
لبيقت الاعمال علشان تتقبل
ولو ماكنتش بتصلى يبقى
ربنا يعوض عليك فى الاعمال
بتاعتك كله هيبوظ
وما ينفعش واحد يكون
مليان ذنوب وتقول قلبه ابيض

=طيب ما هو كل ابن آده خطا

+جميل اوى وخير الخطائين التوابون
والصلاه بتنضفك اول باول
يعنى لو افترضنا ان الذنوب
زى التراب علشان تنضف
تعمل ايه ؟

=اخد دش

+كام مره فى الاسبوع

=يعنى مرة او 2 او 3بالكتير

+طيب لو اخدت خمسه وتلاتين دش فى الاسبوع

=ايه ليه حمله دش كل يوم

+لا كل يوم 5 مرات بس
بس هتنضف خالص من التراب قصدى الذنوب
والذنوب بتجمد القلب

=وكمان مشكله هو مش من اهداف الصلاه
انها تصلحنى

+ايون

=طيب انما الاعمال بالنيات

+طيب انت جعان

=.......!!!!

انتم رايحين فين
لسه الحلقه ماخلصتش
كملوا

الجزء الثانى

+طيب انت جعان

=.......!!!!

+جاوب

=بصراحه اه

+طيب انت عاوز تاكل

=ايون

+طيب شبعت ولا لسه ؟

=هو انا اكلت اساسا

+انما الاكل بالنيات
طالما انت نيتك انك تاكل خلاص
يبقى لازم تشبع

=مش فاهم

+بص انما الاعمال بالنيات
يعنى فى عمل وفى نيه

=اه

+يعنى ما ينفعش ما تكولش وتقول انا شبعت

=اه فهمت
يعنى الاول لازم اصلى وبعدين اقول انما الاعمال بالنيات
وعلى اساسها هيقبل العمل او هيرفض

+بالظبط
وايه تانى من المشاكل

=بالنسبه لى خلاص بس فى واحد صاحبى
كل لما حد يقوله على الصلاه يقوله العمل عباده

+بص اولا ده مش حديث ولا حاجه دى مجرد حكمه
ولو افترضنا ان العمل عباده فالصلاه فريضه واحسبها انت

=معلش افتكرت حاجه
فى واحد اعرفه بيصلى وربنا بيكرهه اوى ديما الراجل ده
عند مصيه
اما ابنه مكسور او عربيته ادغدغة ديما فى مصايب

+ده كده ربنا بيحبه اوى لانه عاوز يكفر عنه ذنوبه
وعلشان الراجل ده يقول يارب
ولسه قايلين واستعينو بالصبر والصلاه

=صح كده اظن ما فيش مشاكل غير اخر واحده
معلش
ساعات بتكون الجو برد وبكسل اتوضى علشان الميه
بتبقى ساقعه

+تستحمل مين
بروده ميه الدنيا
ولا
حراره جهنم فى الاخره

=.....

+والاسلام دين يسر
انت ممكن تدفى الميه وتتوضى
واتصرف وبطل كسل قلنا
طب اقولك على حاجه
عارف لو انت صليت اى صلاه فى جماعه
مره واحده يتكتب لك
وكأنك صليت 280مره

=ايه ....كام ...ازاى ؟

برده عاوزين تمشوا
كمل يا حبيبى انت وهى

الجزء الثالث

+بص حبيبك النبى قال
صلاه الجماعه افضل من
صلاه الفد
ب(27)درجه يعنى هنقول
اقل حاجه 28 لانها افضل من
واول ما الصلاه فرضت
فرضت 50 صلاه
يوميا ولما الرسول كلم
ربنا علشان يخففها عننا
بقت 5 صلوات يوميا وربنا
قال ساعتها
(يا محمد خمسه فى العمل
وخمسون فى الاجر
مايبدل القول لدى )
يعنى الصلاه الواحده
بتساوى 10صلوات فى الاجر
والصلاه فى جماعه
قلنا ب 28 اضربهم فى بعض
28×10=280
واليوم الواحد لو صليت
الخمس فروض
يبقى 1400صلاه
والحساب يوم الحساب

=...ياااااااااا اااه فعلا صح

+انت عارف الحديث بتاع بناء الاسلام

=اللى هو بنى الاسلام على خمس

+بالظبط قولو كده

=الشهاده واقام الصلاه و...

+بس مش ملاحظ حاجه
انك ممكن تشيل اقام الصلاه
وتحط اداء الصلاه

=مش هتفرق كتيير بس ده
حيث ماينفعش اغير فيه

+عارف بس افهم ليه اقام الصلاه
وربنا قال(اقم الصلاه ....)
و(واقام الصلاه ...)الايات

=طيب ليه ؟؟

+لان الاقامه غير الاداء
لان الاداء انت بتأدى حاجه
وبتنزلها من عليك
زى لاعب ادى كويس
فى الماتش
يعنى لعب كويس بس الماتش
خلص خلاص
اما اقامه الصلاه من يقيم الصلاه
زى بالظبط لما اقولك انا
هقيم عمارة هنا
يعنى سواء سكنت فيها
او حتى بنتها وسبتها
هى موجوده
يعنى لو اقمت الصلاه
فى قلبك يعنى
سواء وقت الصلاه او مش فى
وقت الصلاه هى مأثره فيك
بانها بتخليك تبطل معاصى
وبالتدريج ومن غير ماتحس

=هو مش الرسول صلى الله
عليه وسلم قال
من لم تنهه صلاته عن
الفحشاء والمنكر فلا صلاه له
طيب وانا قبل كده قعدت فتره
صلى وماعملتش حاجه

+ينفع واحد انت لسه
مصاحبه من كام يوم
تقوله على اسرارك
وتاخد عليه
وتغير فيه ويغير فيك زى واحد
انت مصاحبه من سنه

=لا طبعا

+خلاص يبقى الصلاه لازم
تاخد الاول عليها علشان تغيرفيك
وثانيا الحديث ده ضعيف
ثالثا ربنا قال (ان الصلاه تنهى
عن الفحشاء والمنكر )يعنى مش
انت اللى هتنهى نفسك
واحنا قلنا قبل كده 4
على واحد حراااااام
والاربعه (النفس الاماره بالسوء)
(والشيطان)
(والهوى يعنى المزاج)
و(الحسد)
عليك لوحدك والحل انك
تستعين بربك وحده
هو اللى هيعينك يبقى انت
لازم تقربله بالطاعه والطاعه
مش مضمونه الا
بالصلاه
والصلاه بنهى عن الفحشاء
والمنكر يبقى انت هتقرب
من غير ماتحس وهتبطل كتيييير
اوى من ذنوبك من غير
ماتحس لانك كل اللى هتعمله
انك هتصلى بس

=طب ازاى الصلاه هتغير فيا
من غير ما احس ؟؟

+هات بلونه
و كور بينج بونج
وبارفان (ريحه,عطر)
ورش على الكور
من البارفان ده وحط الكور فى البلونه

=ايه التشبيهات الغوريبه دى ؟

+ركز وانت ساكت حطيت الكور

=انا هتخيل ...ماشى حطيتها
بس الكور بتدخل بصعوبه

+ عارف دخلها بالعافيه

=دخلهم كلهم

+لو قلت لك ايه رأيك في
الكور هتقول ايه ؟؟

=ريحتهم حلوه

+دى وجهه نظرك
ولكن الريحه دى مؤقته
ومش اصليه (مصنعه يعنى)
والكور واخد مكان
كبر وحجم اكبر
ولو ضغط على البلونه من بره
هتلاقيها ناشفه

=مظبوط وانت صح
بس ايه الحل ؟

+الحل انك تخلى الكور
وتحط من فوق ورد
طبعا هتقعد تحط لحد لما
الانبوله تتملى على الاخر
لان لسه الكور تحت
طبعا فى فرق شاسع
بين الكور والورد
يعنى الورد ريحته احلى
ودائمه واصليه
ومش واخد مكان خالص
وحجمه صغنن جدا
ولو ضغطت على البلونه
هتلاقى انها طريه جدا
طبعا انت هتبتدى تشيل
الكور كوره كوره لانك سرحان
فى ريحه الورد
وكل لما تشيل كوره الورد
يملا مكانهم وانت مش حاسس
بأى فراغ
لكن لو مفيش ورد وانت
ماتعرفش مميزات الورد
هتيجى تشيل الكور
يجى واحد ماسك البلونه
يقول سيبها ماهى ريحتها حلوه
والتانى عامل نفسه فيلسوف
ويقول بالعقل هتشيلها ليه
مش مخسراك حاجه
دى ريحتها حلوه
والتالت يقولك كل الناس
سايبه الكور هتشيها انت
والرابع لو انت قاومت
وشيلتها يقول ياااه قدرت
تشيلها لوحك ويحسدك وترجع
اسوء مما كنت

=انا مش فاهم حاجه خالص

+عارف بص
البلونه (القلب )طريه فى الاصل
الكور (الذنوب )كبيره وواخده
مكان فى القلب ومنشفاه قوى
البارفان (لذه الذنوب )مؤقته مجرد
ما تخلص تنتهى الريحه
(اللذه)
والورد (الصلاه) ريحتها اصليه
ودائمه دنيا واخرة ومش
بتاخد مكان
وبتخلى القلب بطبيعته طرى
والناس اللى بتتكلم
الاول (النفس الاماره بالسؤ)
التانى (الشيطان)
التالت (الهوى و المزاج )
الرابع (الحسد )

=اه فهمت يعنى الصلاه
هتشيل واحده واحده وكل
لما تشيل حاجه
تملا مكانه بالورد

+ايون بالظبط كده

= اى خدمه

+انت عارف الصلاه
فيها ميزه غريبه اوى
انها بتلم معظم
العبادات فيها
علشان كده اسمها
ام العبادات

=يعنى ايه ؟
و يعنى ايه ام العبادات ؟

لسه كمان واحده خلاص
علشان خطرى اخر واحده

الجزء الرابع

=يعنى ايه ؟

+اول ما بتبدأ الصلاه
بتقول الله اكبر (ده ذكر)
وبتقرا قران ,وبتدعى
, وبتمتنع عن الاكل (شبه الصوم )
ولازم تحافظ
على وقتها (فريضه الوقت )
وحاجات كتييير

=اه صح

+وافتكرت مشكله تانيه
ان تارك الصلاه كافر

=بس فى ناس بيقولو مش
خارج من المله وناس
بيقولو خارج

+خارج ولا مش خارج انت ايه
اللى يخليك تاخد اللقب ده اساسا

=صح

+عارف الحب من طرفين

=احنا بنتكلم فى الصلاه ...

+هو مش احنا قلنا
هندردش مع بعض

=ماشى بس فى الصلاه

+احنا فى الصلاه

=ماشى عارفه

+عارف الحب من طرف واحد

=عارفه بس خنيق اوى
تقعد تحب واحد
ويفضل حلقلك ومطنشك
وفى الاخر تزهق
والحب من طرفين زى العسل

+طب الصلاه حب من طرفين

=ازاى ؟؟

+ربنا قال قسمت الصلاه
بينى وبين عبدى
ولعبدى ما سأل

=طب ازاى ؟؟

+لما بتدخل فى الصلاه
وتقول الحمد لله رب العالمين
ربنا يرد عليك ويقول
حمدنى عبدى
وكده
واقرب ما يكون العبد من
ربه وهو ساجد
يدعى براحته

=بص انت بصراحه
اقنعتنى بالصلاه
ولكن انا عاوز اخشع ...ازاى ؟؟

+سهله اوى احنا اتكلمنا
عن عن الايه
واستعينو بالصبر والصلاه

=اه

+وهقولك كمان حاجه
انت عارف انت هتصلى لمين ؟

=لربنا

+يبقى لازم تحط فى
دماغك مين ربنا
الكريم
الغفور
التواب
الرحيم
ثانيا لازم تركز اوى
فى الصلاه وصلى كأنها
اخر صلاه فى حياتك
ثالثا حط فى دماغك الصلاه
اما تدعي لك او تدعى عليك
رابعا وى اللى هتسبتك
انا لما بتدخل الصلاه ربنا
بيقبل عليك بوجهه
ما احنا قلنا
(حب من طرفين )
ولكن اول ما تلتفت
اوتسرح او تنشغل
بحاجه تانيه ربنا
يقولك

(لخير منى ؟؟؟)

(يعنى اللى انشغلت بيه
ده احسن من ربنا)
اظن مفيش اجابه فلازم
تركز اوى
وتخشع وتعيش
وعاوزك تعيش
اوى فى الصلاه
عيش استمتع بأيات
ربنا
واستمتع بالايات يعنى
الحمد لله رب العالمين
عصيته ومهلك ومن عليك
بالصلاه وانت لسه بصحتك
وانعم عليك ورزقك
رغم معصيتك ليه
(الرحمن الرحيم)
فعلا رحمته وسعت كل شئ
(مالك يوم الدين )
ايوه على العظمه اكتر يوم
بنخاف منه بأيده ينجيك
ويطمنك
او يبهدلك
(اياك نعبد واياك نستعين )
يارب بعبدك عصيتك بس
بحبك ورجعتلك وهستعين بك
يارب ومش هروح لغيرك
لانك
حبيبى
(اهدنا الصراط المستقيم )
يارب اهدنا للطريق الصح
اهدنا للاسلام وللجنه
(صراط الذين انعمت عليهم )
الطريق اللى انت انعمت
عليه للناس الكويسه والصالحه
(غير المغضوب عليهم )
اللى هما النصارى
(ولا الضالين)
اللى هما اليهود
واقرا بالراحه لعلك تموت
وانت بتصلى يبقى يا بختك والله
وتقرا اى سوره او
ايه تعجبك ودوقها
وبعدين اركع
وقول
سبحان ربى العظيم
3مرات واستشعر
يعنى ايه توطى
وتحنى جسمك لله
وبعدبن قوم اقف
واركز فى مكانك يعنى
اقف عدل وقول
سمع الله لمن حمده

ربنا ولك الحمد
(احمده من قلبك )
وبعدين اسجد
وقول
سبحان ربى الاعلى
خلاص يبقى فى الركوع
سبحان ربى العظيم
ووانت على الارض
سبحان ربى الاعلى
وادعى براحتك
وباللغه اللى تعجبك
وقوم اقعد واسجد كمان
مره وقول
سبحان ربى الاعلى 3
مرات وادعى براحتك
وقوم كل ركعه على كده بس
بعد كل ركعتين اقعد
واقرا التشهد وافهمه
انا عارف انك حافظه
ولكن افهمه
اولا ده كان حوار
بين
حبيبك النبى
و
ربنا سبحانه وتعالى
لما النبى دخل الجنه
فى الاسراء والمعراج
فالنبى قعد ادام ربنا القعده
اللى بنقعدها فى التشهد
وقال لله
(التحيات لله والصلوات والطيبات )
فربنا حبيبنا
قال لنبينا محمد
(السلام عليك ايها النبى ورحمه الله وبركاته )
فالنبى
رد
وقال
(السلام علينا وعلى عباد الله الصالحين )
بص حبيبك والله لو انت
مكانه ماكنت هتفكر غير فى
نفسك النبى حتى
وهو قاعد ادام ربنا حبيبنا
بيدعيلنا وبيلقى علينا
السلام والله بجد بنحبه
فحمله العرش
قالوا
( اشهد ان لا اله الا الله
وان محمد عبده ورسوله )
وبعد كده هتصلى
على النبى الصلاه الابراهيميه
وهى
(اللهم صلى على محمد وعلى ال محمد
كما صليت على ابراهيم وعلى ال ابراهيم
وبارك على محمد وعلى ال محمد
كما باركت على ابراهيم وعلى ال ابراهيم
فى العالمين انك حميد مجيد )
وممكن تبسطها
وتقول فى الصلاه الابراهيميه
(اللهم صلى وبارك على محمد
وعلى ال محمد
كما اصليت وباركت على ابراهيم
وعلى ال ابراهيم
فى العالمين انك حمد مجيد )

=طب مش المفروض اقول سيدنا محمد

+حبيبك النبى قال
لا تسيدونى فى الصلاه
يعنى ماتقولش سيدنا محمد
فى الصلاه لكن قولها
بره الصلاه عادى

=طب معلش انا مكسوف اوى من الطلب ده ياريت توضح للناس عدد الركعات
والسنن المفروضه

+بص كل الصلوات
المفروصه هتصليها
4 ركعات الاالصلاه
اللى قبل شروق الشمس
بتبقى ركعتين ودى من
رحمه ربنا علينا لان الناس
بتبقى صاحيه من النوم
وعاوزه تنام ولكنها فضلت
ربنا عن النوم
والصلاه اللى لما الشمس
تغرب بتبقى 3 ركعات
والباقى اللى هما
الظهر
والعصر
والعشاء
4 كعات
والسنن بقى 2قبل الفجر
ودول خير من الدنيا
وما فيها يعنى تصليهم كأنك
كسبت الدنيا
باللى فيها
لا اسف
ده احسن من الدنيا باللى فيها

=طب اشمعنى دول

+لانك بتبقى لسه صاحى
من النوم وسايب النوم
علشان تقابل حبيبك
فلازم ربنا يغلى
ثمنهم وده كرم منه
وقبل الظهر 4 ركعات
وبعدها ركعتين بس
وخلى بالك ممكن تصلى
قبل الظهر 4 وبعده
4 وتاخد شهاده ضمان
بأنك محرم على النار
ومش هتدخلها يلا خد
الشهاده انت ضامن عمرك ؟؟؟
والعصر راحه من السنن
والمغرب ركعتين بس
والعشاء برده ركعتين بس
واحلى حاجه انها مفيهاش
اى تعب ولا بهدله
لانك لو صليت
ال12 ركعه
فى يوم واحد
ربنا يبنى لك
بيت فى الجنه

=بيت فى الجنه ب 12 ركعه
بس ...
يابلاش

+وانا كمان عندى فكره
ايه رأيك نعمل مدينه سكنيه
ليا انا بس كل كام
يوم ابنى بيت
وب 12 ركعه
بس والله اوكازيون ربانى

=اخر سؤال معلش

+اتفضل

=طب بالنسبه للصلوات
اللى انا ماصليتهاش قبل كده
هصليها امتى ؟؟

+انت نسيت انت بتصلى لمين ؟

=لربنا طبعا

+طب وربنا من صفاته
التواب والغفور والكريم
يعنى مجرد ما انت
تروح له وتتوب له
يسامحك فى اللى فات

=يعنى ما اصليش اللى عليا

+تانى انت رايح تصلى
للكريم التواب

=يااااااااااااا ااااااااااااااه
على الكرم والعظمه
بجد عيب اوى عليا
ان الفتره دى كلها
مبصليش واشكره على نعمه
يارب
يا حبيبى
لئن احييتنى لارينك ماذا سأصنع
يارب
لو اديتنى العمر
هتشوف انا هعمل ايه
وهشكرك ازاى

+ايوه كده هى دى
الرجوله انك
تضرب مليون عصفور
بحجر واحد
رضا ربنا
وشفاعه حبيبك النبى
وكوبايه ميه من النبى يوم القيامه
واستجابه دعائك
والناس تحبك
والملايكه تحبك
وتبطل ذوبك ومعاصيك من غير ما تحس
كل ده ب 17 ركعه فى اليوم يا بلاش
(حان الان موعد الاذان )

=طب يلا السلام عليكم ورحمه الله وبركاته علشان الصلاه

+وعليكم السلام ورحمه الله وبركاته وابقى ادعيلنا

منقوووووووووووول

يا ساسو ايه رايك ندكج كل المواضيع بتاعت الحملة ونثبتها

وانا موافقه بس يارب الكل يستفيد

اوك جارى الدمج والتثبيت

» حملة (هنتغير بجد)..للشباب
» حملة (هنتغير بجد)..للشباب
» حملة (هنتغير بجد)..للشباب
» حملة (هنتغير بجد)..للشباب
» حملة (هنتغير بجد)..للشباب